ڊاڪٽر عبدالرحمان جسڪاڻي

عبدالرحمان جسڪاڻي، ڊاڪٽر: تعليم جي ميدان ۾ خدمتون سرانجام ڏيندڙ ڊاڪٽر عبدالرحمان جسڪاڻي، 2 مارچ 1960ع تي ڳوٺ دُٻي، تعلقي ميرواهه، ضلعي خيرپور ۾ پرائمري استاد حسن بخش جسڪاڻيءَ جي گهر ۾ جنم ورتو. سنڌي تعليم پرائمري اسڪول دُٻي، اٺون درجو مڊل اسڪول عثمان رند، مئٽرڪ هاءِ اسڪول ٺري ميرواهه ۽ انٽر ممتاز ڪاليج خيرپور مان ڪيائين. جنهن بعد ايران، عراق، ترڪي، اردن ۽ شام جي ملڪن ۾ تفريح لاءِ ويو. هڪ سال تائين شام ۾ رهي عربي ٻوليءَ جي مڪمل سکيا ورتائين. وطن ورڻ بعد سنڌ يونيورسٽي، ڄام شوري مان 1983ع ۾ ايم. اي (عربي) ڪيائين. جنهن بعد مختلف وقتن تي تعليم کاتي، سينٽرل ايڪسائيز ۽ لينڊ ڪسٽم ۾ ملازمت ڪرڻ کانسواءِ پاڪستان اسٽيل جي تعليم کاتي سان پڻ منسلڪ رهيو. ملازمت دوران 1986ع ۾ سنڌ يونيورسٽي ڄام شوري مان ايم.اي سنڌي، 1986ع ۾ شاهه عبداللطيف يونيورسٽي خيرپور مان ايم.اي صحافت، 1996ع ۾ ايم فل ۽ 2008ع ۾ ‘شاهه عبداللطيف ڀٽائيءَ جي شاعريءَ ۾ اسلامي قدر’ جي عنوان سان ڊاڪٽر نواز علي شوق جي نگرانيءَ هيٺ تحقيقي مقالو لکي پي. ايڇ. ڊي ڪيائين. سندس پي. ايڇ. ڊي ٿيسز سياحت ۽ ثقافت کاتي، حڪومت سنڌ پاران ڇپيل آهي. ڊاڪٽر عبدالرحمان تعليم سان گڏ سماجي خدمتن جي شعبي سان تعليم، صحت ۽ ڀلائي جي ڪيترن ئي منصوبن تي ڪم ڪيو آهي، جڏهن ته ريڊيو ۽ ٽي وي جي مختلف چئنلن تي علمي ادبي، سماجي ۽ مذهبي موضوع تي پروگرام ڪندو رهيو آهي. سندس لکيل ڪيترائي علمي ۽ ادبي مضمون ۽ مقالا سنڌي ۽ اردوءَ جي مختلف اخبارن توڙي مختلف يونيورسٽين جي تحقيقي جرنلن ۾ ڇپيل آهن. ان کانسواءِ نصابي ڪتابن نائين، ڏهين ۽ ٻارهين جي سنڌي ۽ اسلاميات جي تياريءَ ۾ شامل رهيو آهي ۽ تر جمي ۾ سندس ڪيترائي مضمون مقالا ۽ ڪتاب پڻ ڇپيا آهن. پاڻ هن وقت پاڪستان اسٽيل ڪيڊٽ ڪاليج، اسٽيل ٽائون ڪراچيءَ ۾ پرنسپال ۽ پراجيڪٽ ڊائريڪٽر جي حيثيت سان خدمتون سان سرانجام ڏئي رهيو آهي.

داخلا ۾ استعمال ٿيل تاريخون

1960.03.02  عيسوي

ڊاڪٽر عبدالرحمان جسڪاڻي، 2 مارچ 1960ع تي ڳوٺ دُٻي، تعلقي ميرواهه، ضلعي خيرپور ۾ پرائمري استاد حسن بخش جسڪاڻيءَ جي گهر ۾ جنم ورتو.

شخصيتون - ڀاڱي جون ٻِيون داخلائون